திருச்சி அருகே கல்லூரி விடுதிக்குள் புகுந்த மர்ம கும்பல்… நடுங்கிய மாணவர்கள்… நடந்தது என்ன? (வீடியோ இணைப்பு)

திருச்சி, சமயபுரம் அருகே இயங்கி வரும் தனியார் பாலிடெக்னிக் கல்லூரியின் விடுதியில் 50-க்கும் மேற்பட்ட மாணவர்கள் தங்கி படித்து வருகின்றனர். இந்தநிலையில் நேற்று( மே 18) இரவு 3 இருசக்கர வாகனங்களில் கருப்பு நிற மாஸ்க் அணிந்து கொண்டு 9 பேர் கொண்ட கும்பல் கல்லூரி விடுதிக்குள் புகுந்தது. பின்னர் அவர்கள் மாணவர்கள் தங்கி இருக்கும் 2 அறைகளின் கதவை உடைத்துள்ளனர். இதனைப் பார்த்து அதிர்ச்சியடைந்த மாணவர்கள் பயத்தில் கூச்சலிடவே, உள்ளே புகுந்த மர்ம நபர்கள் மாணவர்களின் கழுத்தில் கத்தியை வைத்து சத்தம் போட்டால் கொன்று விடுவோம் என மிரட்டியுள்ளனர். தொடர்ந்து மாணவர்களை மண்டியிட வைத்த மர்ம கும்பல் மாணவர்கள் வைத்திருந்த பெட்டிகளை திறந்து அதில் இருந்த தங்க செயின், வெள்ளி செயின் மற்றும் 13 செல்போன்கள் ஆகியவற்றை எடுத்துக்கொண்டு மோட்டார் சைக்கிளில் ஏறி மின்னல் வேகத்தில் தப்பி சென்று விட்டனர். இந்த சம்பவத்தில் காயமடைந்த வினோத், சந்தோஷ் ஆகிய இரண்டு மாணவர்களை சக மாணவர்கள் அருகில் உள்ள தனியார் மருத்துவமனைக்கு அழைத்து சென்றனர். இதுகுறித்து மாணவர்கள் கூறுகையில், அவர்கள் யார்? எங்கிருந்து வந்தனர்? என்று தெரியவில்லை. திடீரென வந்தார்கள், எங்களை தாக்கி விட்டு நகைகள் மற்றும் செல்போன்களை பறித்துக் கொண்டு தப்பிச் சென்று விட்டனர். அவர்கள் மது மற்றும் கஞ்சா போதையில் இருந்ததாக தெரிவித்தனர். இந்த சம்பவம் குறித்து சமயபுரம் போலீசார் வழக்கு பதிவு செய்து பாலிடெக்னிக் கல்லூரி விடுதிக்குள் புகுந்து மாணவர்களை தாக்கிய மர்ம கும்பலை வலைவீசி தேடி வருகின்றனர்.