அடுத்த 5 ஆண்டுகளில் மேலும் 2 கோடி வீடுகள் கட்டித் தரப்படும் – இடைக்கால பட்ஜெட்டில் தகவல்…!

நாடாளுமன்றத் தேர்தல் நெருங்குவதால் பல்வேறு எதிர்பார்ப்புகளை ஏற்படுத்தி உள்ள 2024-க்கான இடைக்கால பட்ஜெட்டை மத்திய நிதி அமைச்சர் நிர்மலா சீதாராமன் இன்று(01-02-2024) நாடாளுமன்றத்தில் தாக்கல் செய்தார். பட்ஜெட்டில் பல்வேறு சலுகைகள் அறிவிக்கப்பட்டன. குறிப்பாக, மத்திய அரசு சார்பில் இதுவரை 3 கோடி ஏழை குடும்பங்களுக்கு வீடுகள் கட்டித் தரப்பட்டுள்ளன. அடுத்த 5 ஆண்டுகளில் மேலும் 2 கோடி வீடுகள் கட்டி தரப்படும் என நிர்மலா சீதாராமன் தெரிவித்தார். இன்று தாக்கல் செய்யப்பட்ட பட்ஜெட் நிர்மலா சீதாராமனுக்கு 6-வது பட்ஜெட் ஆகும். மோடி தலைமையிலான மத்திய அரசுக்கு இது தொடர்ச்சியான 11- வது பட்ஜெட். நாடு சுதந்திரம் பெற்ற பின்னர் 4-வது முறையாக காகிதம் இல்லாத பட்ஜெட் தாக்கல் செய்யப்பட்டது. மத்திய இடைக்கால பட்ஜெட்டை தாக்கல் செய்வதற்கு முன்னதாக குடியரசுத் தலைவர் திரவுபதி முர்முவை, நிதி அமைச்சர் நேரில் சந்தித்து வாழ்த்து பெற்றார்.